На кірмаш ты сягоньня прыехала зноў.
Можа пройдземся разам, дзе іскрыцца шоўк,
Дзе пярсьцёнкі, і пацеркі, і грабяні –
Ўсё, што трэба нявесьце. Ты толькі зірні!
А далей – бубны, скрыпкі, жалейкі ляжаць,
На якіх можна сёньня вясельле сыграць.
Побач – лыжкі, збаны, палуміскі, нажы –
Ўсё, патрэбнае, каб гаспадаркаю жыць.
Тут жа – забаўкі, нават калыскі стаяць,
У якіх калыханкі, здаецца, зьвіняць...
Не адкладвай, прашу, ад вясны да вясны
Ты ўсе гэтыя нашы пакупкі і сны,
Покуль на кірмашы хто іх не разабраў,
Покуль з гора я грошыкаў не прагуляў.
1965
|
|
